Jæja, þá fer ég að verða búin með zik zak ungbarnateppið sem var og er frumraunin mín í að hekla :) Kemur mjög vel út og ég er alveg ferlega montin með það :)
Vantar reyndar fínan kant á zik zak teppið, hvaða kant er auðvelt að hekla utan um teppið og er fallegur á þessa gerð af teppi?
En svo langar mig að gera annað teppi sem er álíka einfalt en samt ekki alveg eins. Er einhver sem veit um einfalda og skemmtilega uppskrift?
Skelli inn mynd af teppinu þegar það er tilbúið :)
Mér finnst ýmsir kantar koma til greina á svona teppi, kíktu á síðuna hjá þessum heklsnillingi:
http://handod.blogspot.com/ Til hægri á síðunni hennar eru tenglar á leiðbeiningar sem hún hefur gert fyrir nokkra kanta, margir fallegir þarna.
Hlakka til að sjá mynd, svona teppi eru alltaf svo krúttleg.
En hugmynd fyrir næsta teppi.....kannski einhverjir ömmuferningar? Þeir eru alltaf klassískir og sætir í mörgum litum. Ef þú vilt eitthvað sem er heklað í heilu lagi til að sleppa við frágangsvinnu þá dettur mér í hug "bylgjuteppi"....en það er kannski of líkt zikzak teppinu.
Ég gerði teppi með bylgjumynstri sem mér finnst koma mjög vel út, einfalt en fallegt. Bara gert úr fastapinnum, hálfstuðlum og stuðlum:
Þessi lýsing miðar við að notaðir séu 2 litir, A og B.
ll=loftlykkja
fp=fastapinni
hst=hálfstuðull
st=stuðull
Byrja með loftlykkjukeðju sem er mátuleg breidd fyrir teppið og gengur upp í 8 +1 (þ.e. mynstrið er 8 lykkjur svo þarf 1 auka til að byrja 1. umferðina), til dæmis 81 loftlykkja.
1. umferð: Með lit A. 1 fp í 2. ll frá þér. *1 hst í næstu ll, 1 st í næstu 3 ll, 1 hst í næstu ll, 1 fp næstu 3 ll*. Endurtekið frá *til* út umferð, endað á fp í síðustu 2 ll. Snúa.
2. umferð: 1 ll, sleppa fyrsta fp, 1 fp í hverja lykkju umferðina á enda, endað er á að skipta í lit B um leið og gerður er fp í ll umferðarinnar á undan. Ekki klippa lit A frá.
3. umferð: Með lit B. 3 ll, sleppa fyrsta fp, 1 st í næsta fp, *1 hst í næsta fp, 1 fastapinni í næstu 3 fp, 1 hst í næsta fp, 1 st í næstu 3 fp*. Endurtekið frá *til* út umferð, endað á 1 st í fp, 1 st í ll, svo snúið.
4. umferð: 1 ll, sleppa fyrsta st, svo fp í hverja lykkju út umferðina. Endað á fp í síðasta st og fp í 3.ll síðustu umferðar og skipt í lit A. (bara hafa slaka á A endanum á milli umferða svo að teppið hafi svigrúm til að teygjast.)
5. umferð: Með lit A. 1 ll, sleppa fyrsta fp, 1 fp í næsta fp, *1 hst í næsta fp, 1 st í næstu 3 fp, 1 hst í næsta fp, 1 fp í næstu 3 fp*. Endurtekið frá *til* út umferð, endað á 1 fp í síðasta fp og 1 fp í ll síðustu umferðar, snúa.
Umferðir 2-5 endurteknar þangað til teppið er mátulega langt.
Ég gerði mitt teppi úr grófu garni til að nota undir kerrupokann í vagninn. Það kemur örugglega mjög vel út með "barnagarni" (kæmi spes út að nota fleirtöluskömmina "görn").
rug | Ég er ekki viss um að ég kunni að setja inn myndir en reyni, þetta er svona t...
Heklað ungbarnateppi og heklaður kantur?
