Svolítið hefur verið rætt um EDIK og BORÐEDIK. Set inn nokkrar upplýsingar um efnið:
Edik og Borðedik
Edik er nokkurs konar má-nota-á-allt-hreinsiefni. Með því að blanda saman einum hluta af vatni á móti einum hluta af ediki og setja á úðabrúsa ertu komin/-n með hreinsiefni sem hreinsar nánast allt á heimilinu, Borðedik. Auk þess að vera gott náttúruefni til þrifa, þá sótthreinsar edik bæði og gerir loftið ferskara. Gott er að prófa sig áfram með notkun efnisins, en það má samt nota á nánast allt nema marmara. Gætið þess þó að setja ekki of mikið edik í blönduna, því æting í efninu getur skemmt út frá sér. Notið því borðedik.
Í baðherberginu má nota edik til að hreinsa baðker, sturtubotna, salernisskálar, vaska og borðplötur. Best er að nota hreint edik til að losna við hringi innan úr salernisskálum. Fyrst er sturtað niður, edikinu síðan hellt efst í skálina og svo burstað yfir.
Sítrónur
Sítrónusafi er líka eitt af þeim efnum sem nota má við heimilisþrifin. Safann er frábær til að þrífa spanskgrænu af kopar og eir, einkum og sér í lagi ef langt er síðan hann hann hefur verið þrifinn. Best er þá að skera sítrónuna í tvennt og nota sárið til að nudda yfir flötinn sem á að hreinsa. Virkar meira að segja á útihurðarskreytingar úr þessum málmum. Hægt er að blanda saman sítrónusafa og matarsóda til að búa til þykka hreinsiblöndu, en einnig má skera sítrónu í tvennt og strá yfir hana matarsóda og nota hana síðan til að hreinsa með óhreina diska, borðplötur og bletti. Með því að blanda saman 1 bolla af ólífuolíu og ½ bolla af sítrónusafa er svo komin hin besta húsgagnaolía fyrir harðvið.