Ibudtilleigu | Ég bjó þar tímabundið fyrir nokkrum árum og hef farið nokkrum sinnum aftur s...
Ég bjó þar tímabundið fyrir nokkrum árum og hef farið nokkrum sinnum aftur síðan þá. Var einmitt þar núna í september. Borgin er yndisleg og merkilega barnvæn miðað við margar aðrar borgir af svipaðri stærð. Við vorum með ungbarn með okkur núna og það var ekkert mál :)
Það eru einhverjar útisundlaugar en ekki margar. Sum íbúðahúsin eru með sundlaugum, ýmist í garðinum (einbýlishús í úthverfum) eða á þakinu (nýrri fjölbýlishús nálægt miðborginni – oftast niðri við á). En svo er líka strönd á eyju við borgina (þar eru líka stór skemmtigarður, formúlubraut og margt fleira). Það er svona 'gerviströnd' eins og Nauthólsvík og kostar einhverja dollara inn ef ég man rétt.
Þetta er æðisleg borg, nóg um að vera, frábær matur, ólík hverfi til að skoða og þ.a.l. svolítið hægt að velja hverfi til að gista í út frá því eftir hverju maður sækist. Mjög auðvelt að komast um – frábært að labba og hjóla um allt en líka metro og strætó alls staðar. Mikil útivist – borgin liggur eiginlega í kringum Mont Royal 'fjallið' (varla hægt að kalla það fjall, það er svo lágt :) en á því er almenningsgarður, hannaður af sama manni og hannaði Central Park. Þar er ALLTAF fólk að labba, hlaupa, hjóla og bara virða fyrir sér útsýnið. Uppi á því er líka útsýnispallur auk þess sem alltaf eru einhverjar uppákomur í garðinum – útijógatímar opnir öllum, fólk sem safnast saman að spila á trommur o.fl.
Svo er allt morandi í hjólastígum og m.a.s. hjóla'þjóðvegum' sem liggja út fyrir borgina. Niðri við St. Lawrence ána eru svo síki og þar er hægt að fara á kayak, hjólabáta o.fl. Það eru margir almenningsgarðar í borginni, misstórir, sem gaman er að slappa af í og leika sér. Það eru líka þónokkrir markaðir sem gaman er að skoða og fá sér að borða (ég myndi algjörlega fara á bæði Jean-Talon markaðinn í Little Italy og Atwater markaðinn niðri við á...en ég reyndar elska að borða :).
Svo getur verið gaman að skoða ólympíusvæðið og jafnvel fara upp í ólympíuturninn, kíkja í biodome-ið (eeendalaust margar dýra- og plöntutegundir) eða Granby dýragarðinn, fara með dótturina á sýningu hjá brúðuleikhúsi, sjá barnasirkus/danssýningu, fara á tónleika (kannski erfitt með 1,5 árs en það er allt mooorandi í góðum tónleikum), skoða grasagarðinn (hann er upplýstur á kvöldin hluta árs), borða óendanlega mikið af góðum mat (naaammm maturinn!), fara á comedy show, fara í þrívíddarImaxbíó í Science Museum, kíkja á Cirque de Soleil sirkussýningu (Cirque de Soleil er upprunalega frá Montréal en eru bara með sýningar þar á sumrin. Þær eru þó í tjaldi, ekki risa sölum eins og annars staðar, og eru því ekki alveg jafn mikilfenglegar og t.d. í Las Vegas ;), kíkja á listasöfnin (t.d. oft mjög skemmtilegar sýningar bæði í listasafninu niðri í bæ, Musée des beaux arts, og nýlistasafninu Musée d'art contemporain) og o.fl.
Það eru líka þónokkur útisvæði sem nýtt eru til að setja upp útitónleika og sýningar. Stærst þeirra er líklega Place des arts ('listatorgið') sem stendur ofarlega við Ste. Catherine (sem er svona 'Laugavegur' Montréal – þó muuun stærri og lengri haha). Við það torg standa m.a. nýlistasafnið, óperan, sinfónían og balletinn. Þar eru líka bekkir til að sitja, upplýstir gosbrunnar og svo riiisa svið þegar jazzhátíðin er í gangi :) Mörgum stöðum er líka breytt á sumrin, svipað litlu stöðunum í miðbæ Rvk - þar sett upp útiveitingastaðir/kaffihús og svo eru þar sýningar/tónlist/dans seinni partinn og á kvöldin. Í júlí eru svo flugeldasýningar á hverju laugardagskvöldi (hluti af flugeldasýningakeppni!)
Sumarið er extra skemmtilegt því Montréal er, skiljanlega, svolítið eins og Reykjavík - það léttir einhvern veginn yfir öllu á sumrin og það er allt í gangi. Hins vegar getur orðið veeel heitt í júlí og ágúst og töluverður raki. Borgin stendur ekki við sjó þannig að það er lítil gola á sumrin sem getur verið erfitt í mesta sumarhitanum, kannski sérstaklega fyrir ung börn. Ég hef verið þar í júlí og fundist allt í lagi. Vorum þó með litla frænda (þá tæplega 2 ára) í skugganum og þurftum alveg að passa upp á vatnsdrykkjuna hans. Það er auðvitað misjafnt hversu heitt er á sumrin en sem dæmi þá fór hitinn allt frá 25 og upp í 32/33 gráður núna um miðjan september þegar við vorum þar ;)
Varðandi verslunina er fínt að versla þar. Það er tæplega 15% söluskattur (5% til ríkisins og rétt tæp 10% til héraðsins) sem er ekki sumstaðar sunnan landamæranna en m.v. gengi kanadíska dollarans núna vs þess bandaríska kemur alls ekkert illa út að versla Kanadamegin (gerðum bæði í sept.).
Það er almennt ódýrara að gista í Montréal en mörgum öðrum 'stærri' borgum og oft hægt að fá hagstætt verð á hótelherbergjum. Við höfum leigt heimaíbúðir síðustu skipti sem við fórum og það hefur gefist frábærlega. Fínt að hafa í huga að velja hverfi út frá því sem þið viljið gera og líklega út frá dótturinni. Mörg hótelanna eru alveg í miðbænum eða í gamla bænum (aðeins dýrara). Þar er nokkurn veginn allt á bæði frönsku og ensku. Í sumum hverfanna, þegar komið er út fyrir þetta center, er franskan meira ríkjandi. Þó það sé ekkert óbarnvænt að vera alveg við 'Laugaveginn' þá eru t.d. fáir leikvellir og slíkt þar, húsin mun hærri og þéttari og meiri umferð. Það er garður niðri við á, alveg við gamla bæinn, þar sem hægt væri að leyfa barni að fá útrás en ég held að ég myndi veðja á hverfi rétt utan miðbæjarins - þar eru fleiri leikvellir og slíkt. Getur verið fínt að byrja og enda daginn á róló eða í almenningsgarði :)
Það eru gríðarlega margar hátíðir í Montréal á sumrin (tvö comedy festivals, jazz hátíð, tónlistarhátíðir) auk formúlunnar. Þegar svoleiðis er í gangi eru hótelin gjarnan dýrari sökum eftirspurnar. Bara gott að hafa það í huga. Jazz festivalið er t.d. venjulega í lok júní og út fyrstu vikuna í júlí ca. (minnir mig).