Að vanda er líf og fjör í Frostaskjóli, en árlegt kassabílarallý frístundaheimilanna okkar verður haldið í ellefta sinn á Ingólfstorgi á morgun. Það hefst kl. 14:10 þegar 550 börn úr fjórum frístundaheimilum ganga fylktu liði í lögreglufylgd frá Skólavörðuholti niður Skólavörðustíginn og Bankastrætið, inn eftir Austurstrætinu og að Ingólfstorgi, þar sem viðburðurinn á sér stað. Áætlað er að keppnin sjálf hefjist milli hálf þrjú og þrjú. Frístundaheimilin keppa um ýmsa eftirsóknarverða titla, svo sem hraðskreiðasta bílinn, flottasta bílinn og besta stuðningsliðið og þegar börnin hafa látið ljós sitt skína keppa starfsmenn um það hvar snörustu starfsmennirnir starfa. Að lokum standa allir uppi sem sigurvegara og fá farandbikar með sér heim í hérað. Að keppni og verðlaunaafhendingu lokinni mun Ingó veðurguð leiða fjöldasöng og almenna gleði á Ingólfstorgi, en áætlað er að öllu verði lokið á rétt fyrir fjögur.
Kassabílarallýið er orðið einn af föstu punktunum í menningarlífi bæjarins, enda fáir viðburðir á vegum borgarinnar þar sem meiri stemming ríkir. Meginmarkmiðið með kassabílarallýinu er að skapa vettvang fyrir gleði og ánægju og setja endapunktinn á velheppnað vetrarstarf frístundaheimila Frostaskjóls. Er engu logið þegar sagt er að bærinn sé bókstaflega rafmagnaður af jákvæðni og stemmingu þegar börnin mæta á svæðið og því ætti enginn af vera svikinn af því að koma og fylgjast með ósvikinni gleðinni. Undirmarkmið kassabílarallýsins er að þjálfa börnin í lýðræðislegum vinnubrögðum, en þau þurfa meðal annars að velja fulltrúa úr hópunum til að keppa fyrir hönd frístundaheimilisins, auk þess sem þau skipta á milli sínu mörgum öðrum verkum, svo sem því að koma að undirbúningi kassabílsins, hanna fána, hristur og skraut fyrir stuðningsliðið og koma með hugmyndir að búningum og hvatningarópum. Allir hafa síðan hlutverk með því að vera verðugir fulltrúar síns frístundaheimilis í göngunni og á viðburðinum sjálfum og að sjálfsögðu með því að hvetja sitt lið drengilega til dáða. Þannig eiga öll börnin hlutdeild í viðburðinum og leggja þannig sitt af mörkum við að gera daginn eftirminnilegan fyrir sig og aðra.
Við stólum á að allir velunnarar Frostskjóls sem vilja hefja helgina á skemmtilegan máta mæti á morgun. Til að koma ykkur í stuð settum við inn veglegt myndaalbúm frá liðnum kassabílarallýum sem ná að fanga anda viðburðarins. Gleðilegt kassabílarallý