Ég er í vandræðum með Nissan Almeru 2001 árgerð. Bíllinn er lítið keyrður, er í 93.xxx km í dag. Þegar ég keypti hann fyrir ca. 3 árum síðan tók ég eftir því þegar kólnaði í veðri að bíllinn var stundum leiðinlegur í gang: hann fór alltaf í gang, en þegar ég steig á bensínið alveg í botn, þá rétt silaðist hann áfram. Stundum þurfti bara að starta honum aftur og þá hrökk hann í gang, en í önnur skipti þurfti að leyfa honum að hitna og starta honum svo til að hann færi alveg í gang.

Ég hef alltaf farið með hann í smurningu á réttum tíma og látið gera við það sem hefur þurft að gera við, en sl. ár hefur verið mikið vesen með hann: það kviknaði vélarljósið í honum og mér var bent á að fara með hann í umboðið til að tengja hann við tölvu og sjá hvað væri að, sem ég gerði og þar sem var enginn laus tími hjá þeim, þá fór ég með pappírana á verkstæði þar sem var gert við þetta. En daginn eftir þá kviknaði ljósið aftur og þá var þetta eitthvað annað sem er að honum en enginn virðist vita hvað er að valda þessu.

En það sem er aðallega að trufla mig varðandi að keyra bílinn er að hann er farinn að hökta svolítið mikið og ég veit ekki hvort það tengist því að hann er leiðinlegur í gang einsog ég lýsti hér í byrjun, og svo þegar ég er komin í ca. 90-100 km hraða, þá titrar bíllinn og maður finnur það í stýrinu og undir fótunum frammí bílnum. Veit einhver hvað þetta getur verið sem er að bílnum?