"Á árinu 2014 var hefðbundin starfsemi á Fjölskyldudeild. Helstu nýjungar voru af tvennum toga. Annars vegar tók úrræðið Askjan fjölskyldustuðningur til starfa 1. október en það er þjónusta sem er veitt inn á heimili, ætluð barnafjölskyldum. Undir merkjum Öskjunnar voru sameinuð þrjú úrræði; tilsjón, ADHD ráðgjafinn heim og Stuðningurinn heim sem hafði verið þróunarverkefni sl. tvö ár og var talið skila góðum árangri. Ráðnir voru tveir starfsmenn í 50% störf, einn starfsmaður úr félagsþjónustunni tók að sér umsjón með verkefninu og síðan var skipaður vinnuhópur, Öskjuteymið, til að sjá um inntöku í úrræðið og fleira. Úrræðið fer vel af stað og það sýnir sig að þörfin er mikil. Hins vegar var ákveðið að styrkja skrifstofuna með því að bæta við hálfu starfi móttökuritara. Þannig var skrifstofueiningin efld og telur nú þrjá starfsmenn í stað tveggja áður."
