Með orðinu "sjónskekkja" er venjulega átt við það sem á ensku nefnist "astigmatism" en þar er um að ræða galla í ljósbroti augans, líkt og maður ætti myndavél með gallaðri linsu og því væri aldrei góður fókus á myndunum. Ef við hugsum okkur að venjuleg linsa væri búin til með því að skera sneið af glerkúlu, þá yrði linsan jafn mikið kúpt í hvernig sem á hana er horft. Ef linsan væri skorin úr gleri sem væri eins og amerískur fótbolti í laginu (svona aflangur, miskúptur) þá væri linsan mismikið kúpt eftir því hvernig henni er snúið. Sjónskekkja stafar af því að yfirborð augans er miskúpt eins og fótboltinn eða að augasteinn (enska: "lens) er miskúptur. Sjónskekkja er leiðrétt með gleri sem er með jafn miklum mun á kúpunni eins og gallinn er í auganu og svo þarf að snúa glerinu í umgjörðinni þvert á gallann í auganu til að það jafn út gallann. Magn sjónskekkjunnar er mælt í ljósbrotseiningunni "diopter" (algengur styrkur er 0,50 til svona 2,0) Talað er um "öxul" í sjónskekkjuglerjum sem segir til um stefnuna á sjónskekkjuslípuninni og það þarf að setja glerið inn í umgjörðina þannig að öxullinn passi við stefnuna á sjónskekkjunni í auganu. Gráðutalið segir hvernig öxullinn á að snúa en segir ekkert um styrk glersins, diopter segja til um hann. 0° er lárétt, 90° er lóðrétta og 180° er aftur lárétt ( = 0° ) Oft er fólk með samsettan sjóngalla, t.d. nærsýni en líka miskúpt auga og þá í raun mismikið nærsýnt eftir því hvernig mælt er. Segjum til dæmis að einhver mælist nærsýnn -1,00 þegar mælt er lárétt (í 0°) en mælist -1,75 þegar mælt er lóðrétt (í 90°) Þá myndi hann fá gleraugnastyrk sem væri ritaður svona: -1,00 sph -0,75 cyl 0° sph =sperical, þ.e. reglulegt gler cyl = cylindrical þ.e. sjónskekkjugler Þessir tveir þættir eru svo slípaðir saman í eitt gler.
Ekki rugla þessu saman við "augnskekkju" sem á ensku kallast "strabismus" eða "squint" Þar er vandamálið að augun horfa ekki í sömu átt, t.d. að hægra horfi beint en vinstra í áttina inn að nefi eða út til hliðar. Einnig er til hæðarskekkja.
Það er fræðsla um ýmsa augnsjúkdóma á vefsíðu Augnlæknafélagsins