Vigdís Hauksdóttir, formaður fjárlaganefndar, segist vilja endurskilgreina hlutverk Ríkisendurskoðunar og umboðsmanns Alþingis. Segist hún vilja gera það á þann hátt að „embættin fari ekki langt út fyrir valdheimildir sínar á grunni venju sem hefur skapast undanfarin ár.“
Vigdís segir í færslunni að fjárlaganefnd hafi vísað „fjárhagsmálefnum Barnaverndarstofu“ til rannsóknar hjá Ríkisendurskoðunar og segir að ef þetta er skýrslan þá sé „embættið ekki að skilja hlutverk sitt.“
Full ástæða til að skoða stöðu barnaverndarmála í heild sinni Í fundargerð fjárlaganefndar frá 24. október síðastliðinn segir að nefndin muni óska eftir „úttekt Ríkisendurskoðunar á stöðu barnaverndarmála, m.a. meðferð fjármuna til að mæta þjónustuþörf og nýtingu úrræða og samskipti milli ríkis og sveitarfélaga og annarra aðila sem að málinu koma.“
Í viðtali við RÚV í október sagði Guðlaugur Þór Þórðarson, varaformaður fjárlaganefndar, að nefndin hafi fjallað um málið, fengum til sín gesti til þess að skoða einn þátt málsins og það hafi verið samhljóma niðurstaða nefndarinnar eftir það, að full ástæða væri til þess að skoða stöðu barnaverndarmála í heild sinni.
Ekki náðist í Vigdísi við vinnslu fréttarinnar.
Eygló segir ábendingar Ríkisendurskoðunar gagnlegar Ríkisendurskoðun birti í dag úttekt á stöðu barnaverndarmála á Íslandi sem unnin var að beiðni fjárlaganefndar. Í frétt velferðarráðuneytisins segir að ráðuneytið sé komið vel á veg með vinnu við ýmsar úrbætur sem stofnunin telur nauðsynlegar. Eygló Harðardóttir, félags- og húsnæðismálaráðherra segir ábendingar Ríkisendurskoðunar gagnlegar og að unnið verði í samræmi við þær.
Í skýrslu Ríkisendurskoðunar kemur fram að leitað hafi verið svara við þremur spurningum, það er hvort skipulag í barnaverndarmálum sé markvisst og stjórnsýsla vönduð, hvort samskipti og samstarf barnayfirvalda sé árangursríkt og hvort stefnumótunar- og eftirlitshlutverk velferðarráðuneytisins sé skýrt og því sinnt á fullnægjandi hátt.
Á grundvelli úttektarinnar setur Ríkisendurskoðun fram eftirtaldar ábendingar um að:
Ráðuneytið beiti sér fyrir góðu samstarfi barnaverndaryfirvalda.
Ráðuneytið endurskoði vinnulag við gerð og framlagningu framkvæmdaáætlunar í barnaverndarmálum sem leggja ber fram að loknum sveitarstjórnarkosningum.
Ráðuneytið tryggi sérhæfð meðferðarúrræði á höfuðborgarsvæðinu fyrir börn á aldrinum 16–18 ára sem glíma við alvarlegan vímuefnavanda og afbrotahegðun og fyrir börn með fjölþættan vanda, svo sem geðröskun og hegðunarvanda.
Ráðuneytið skýri stjórnsýslulega stöðu Barnaverndarstofu, taki af tvímæli um hvað felist í sjálfstæði stofnunarinnar og hverjar séu stjórnunar- og eftirlitsheimildir ráðuneytisins gagnvart henni og skýri hvert sé ráðgjafarhlutverk Barnaverndarstofu gagnvart barnaverndarnefndum sveitarfélaga.