Allir vita að best er að læra tungumál með því að æfa sig í að tala, alla vega jafnframt með því að læra að skrifa. Margir kunna eitthvað, en vantar æfingu í tali. Ég hef verið í grúppu á Spáni, þar sem fólk á öllum aldri hittist á einhverjum kaffistað og ásamt kannski einum eða tveimur innfæddum (í sjálfboðavinnu) er spjallað saman á spænsku í tvo tíma, stranglega bannað (en oft svindlað) að tala annað tungumál. Aðrir hópar koma saman og tala ensku, enn aðrir önnur tungumál og auk þess eru blandaðir hópar, þar sem bæði er setið við borð þar sem fólk vill tala ensku og æfa sig í henni og síðan önnur (eða annað) borð, þar sem töluð er spænska. Maður lærir ótrúlega mikið að losa sig við feimnina við að prófa, þrátt fyrir að kunna næstum ekki neitt í byrjun. Engin skilyrði fyrir þátttöku, bara áhugi á að tala málið. Þetta er verulega skemmtilegt þarna úti og mér datt í hug að athuga hvort einhverjir væru til í að athuga þetta hér heima. Hér væri einnig upplagt tækifæri fyrir þá útlendinga, sem vilja æfa sig í íslensku. Ókeypis auðvitað, og kannski væri hægt að semja um afslátt af kaffi eða drykkjum við einhvern kaffihússrekanda, en það er auðsótt mál á Spáni, þar sem ég hef verið. Á ensku heita þessir hópar LEG (Language Exchange Group) og gert er ráð fyrir þvi að allir geti tekið þátt með því annaðhvort að kenna öðrum (með því að spjalla, spyrja og ræða málin) eða/og læra sjálfir. Ég hef áhuga á því að halda við þessari spænsku sem ég kann og læra að tala málið betur. Gæti miðlað af minni þekkingu líka, en ég hef farið á nokkur spænskunámskeið hér og erlendis. En það er ekki það sama og að geta spjallað! Ég er komin vel yfir miðjan aldur en fólk i "minni" spænskugrúppu úti er frá 17 ára og elsti sá, sem mætir oft er kominn vel yfir áttrætt. Endilega komið með hugmyndir eða sendið skilaboð á netfangið hressakata@hotmail.com